PRO MASTER BADMINTON LEAGUE (PMBL)-2018 AH MIZO TELNA CHAMPION
03rd August, 2018
Nithum awh Badminton League July 30, 2018 atanga Visakhapatnam-a khelh zawh takah Mizo Shuttlers Pu Lalmuanawma telna Himalayan Tiger chuan Final-ah Sunriser Hyderabad Team-te 4 – 1 a hnehin Champion nomawi an chawi.
PMBL hi Veteran players tana buatsaihniin kum 35 chin chunglam tana khelh tur a niin, Laqshya Badminton Academy in a buatsaih a ni. He League ah hian Team 6 awmin, Wristy Master (Delhi), Hyderabad Worrier, Himalayan Tiger, Rhino Smasher (NE), Shining Star leh Sunriser Hyderabad tenan khel a, an players turte hi Auction hmangin an lei hlawm a ni. He League hi Badminton Association of India in a pawmpui a ni.
Team tin hian players 16 neiin, mipa 12 leh hmeichhia 4 an nei hlawm a. Heng players te hian category hrang hrang 7 ah inkhelin Doubles veka khelh a ni a, chung category te chu players kum belhkhawma Mens Doubles-ah 75+, 85+, 95+ leh 105+ te niin hmeichhe tan 70+ a awm bakah Mixed Doubles-ah 75+ leh 80+ te an ni. Heta khel tur players-te hi Organising lamin National leh Internation level-a che thate lawrkhawmin, heng an lawrkhawmte atang hian Team-te hian players an lei a ni.
Game hi Team paruk-te hian League khelin an intum kual vek hnuah point hmusang pali – Sunriser Hyderabad, Rhino Smasher, Wristy Master leh Himalayan Tiger-ten Semi Final khel leh a ni. Champion Team, Himalayan Tiger-te hian League Round-ah vawi 4 chakin, vawikhat an chak lo a, Semi-Final ah Wristy Master, Delhi tumin chakna an chan hnuah, Final-ah Sunriser Hyderabad hnehin an Champion ta a ni. He inenlnaah hian Champion Team-ten Cash Prize Rs 6 lakhs leh Runner Up Team ten Rs 3 lakhs an dawng a ni.
He League-a Champion Team player Lalmuanawma hian Team participate-ah game khel ziahin Himalayan Tiger-tan hian Key Player ah an hmang a, an Team chhung bikah Best Player-ah thlan niin Team Manager hnan atangin Bonus Money a dawng nghe nghe a ni.